August 6, 2010
"أنا بمووووووت فى مصر" , دى اجابة مواطن سألته بتحب مصر ؟! البعض قد يرى الأجابة غير واقعية ,بل الأغلبية ,لكن الراجل مكدبش هتقولى هات برهانك ,أقولك اننا فعلا بنموووووت فى مصر و اللم مش هيموت دلوقتى هيموت بعدين !!ا واللى يشوف هيموت...و هتشوف ..أو هتموت !!
طب مدام هتموت ما تختار الطريقة اللى تموت بيها و صدقنى ده أسهل بكتير من انك تنضم لحزب ما أو تقول "كفاية" أو حتى تختار اللى "هيرقص" الرقصة الجاية ,و الحكومة عارفة مشاغل الشعب و عارفة العضمة كبرت فكتر خيرها بتخترلنا عشان ميعجبهاش الحال المايل ,فمنذ أن غنت لوحدها "اخترناك..اخترناك "و الى
يومنا هذا لم يشترك الشعب فى "كورال الأجيال" حيث زامن ظهور الأغنية انشغال الشعب "بالأفتتاح" وده يلزمه هيصة و هليلة !!
و زى ما عبير كانت بتقول لعماد امبارح :
-احنا داخلين على أيام سودة يا عماد
-ليه كفا الله الشر يا حبيبتى
-بابا يا سيدى مرشح نفسه و حالف ما نتجوز الا لو كسب السنة دى
- حالف ده ايه ,كله الا ده ,قوليلى أبوكى مرشح نفسه على دايرة ايه ؟
-دايرة "المحروسة"
_طب يا سيتى دول ناس طيبين قوى,خلى بس أبوكى يوفر الألفات اللى عمال يوديها يمين و شمال و فى الاخر مش هيكسب برضو ,و قوليلوا أنا هفضلوا الدايرة ديه فى ساعة زمن
-ازاى ؟!!
-مفيش,مصنع فيبر و نسرب أسطوانة كلور صدقينى متجربة !!
- ازاى بس يا عماد و الناس ذنبها ايه ؟؟
-ذنبها ايه !!طب حلفان على حلفان أبوكى ما أنا متجوزك لو أبوكى ما عمل كده !!
وبعدين لو مش عجبك مصنع الفيبر يفكر فى حاجة تانية هو أبوكى هيغلب...صدقنى يا عبير الراجل اللى يقنع أهل دايرته كل سنة أنه طالع الحج و يروح مارينا يقدر يعمل أى حاجة .................................صدقيه يا عبير !!
وأخيرا و لس أخرا بختك اليوم:جهود مكثفة من قبل شباب بتحب مصر _بس مش بتموووت فى مصر_لجمع توقيعات 5 ملايين "لجمال" كرئيس مصر القادم و وصل عدد التوقيعات حتى الأن 17 ألف توقيع و أنا بحذرك أننا داخلين على أيام مفترجة "للركب" ,ده كله من "أجلك أنت" ,فأنا بقترح بما أننا قررنا نختار الموتة اللى هنموتها و مدام مش فارقة مين اللى "هيرقص" نعمل بند فى التوقيع بعنوان "هتحب تموت ازاى الأيام الجاية"
و هكذا ممكن تكون الاختيارات :
1.أموت مخنوق بغاز الكلور
2.أموت زى ما مات خالد.
3.أموت من الجوع.
4.أموت و الأتوبيس يجى .
5.أموت و أعرف فين توشكى .
6..........................
7........................
8........................
100.......................و أكتر
101.الاختيار الذى سيفضله الكثير و هو سماع ال single الجديد للحكومة و هو "اموت أنا"!!!!!!!!!!!!!!!!
سارة الصادق
ليست هناك تعليقات:
إرسال تعليق